Scania 4x4 fyrir slökkvilið Hellu
Dælubíll á Scania 4x4 undirvagni
Brunavarnir Rangárvallasýslu á Hellu hafa tekið í notkun nýjan dælubíl á Scania P500B 4x4 undirvagni með Egenes ál yfirbyggingu framleidda í Flekkefjord í Noregi. Með þessari afhendingu kemur Egenes slökkvibíll aftur til Íslands eftir langt hlé.
Bíllinn er hannaður með þarfir íslenskra slökkviliða að leiðarljósi og byggir á traustu samstarfi við Egenes Brannteknikk og Rosenbauer. Sjálfberandi ál yfirbygging frá Egenes býður upp á gott skápapláss, sérsmíðaða innréttingu og samfellda tengingu milli stjórnklefa og yfirbyggingar. Dælurými er frostvarið og vatns- og froðutankar eru einangraðir inni í yfirbyggingunni, sem hentar vel íslenskum aðstæðum.
Undirvagninn er Scania P500B 4x4 með 500 hestafla vél og sjálfskiptingu. Áhafnarklefi er af gerðinni Scania CP28L með Bostrom reykdýfarasætum.
Yfirbyggingin er framleidd hjá Egenes í Noregi og byggð úr áli með áherslu á endingargóð efni, gott aðgengi og skýra uppsetningu búnaðar.
Bíllinn er búinn Rosenbauer NH35 slökkvidælu með afköstum allt að 3500 l/mín við 10 bör og 400 l/mín við 40 bör. Dælan getur verið bæði lág- og háþrýst samtímis.
Einnig er bíllinn útbúinn Rosenbauer CAFS froðukerfi og CUTTEX kerfi. Stjórnun fer fram í gegnum Rosenbauer LCS 3.0 stjórnkerfi með skjám bæði við dælu og í stýrishúsi.
Bíllinn er útbúinn monitorum frá Rosenbauer á þaki og stuðara, háþrýsti- og froðuslöngukerfum, björgunarverkfærum, reykköfunarbúnaði, ljósamastri og fjölbreyttum aukabúnaði. Uppsetning og búnaðarval endurspeglar þarfir slökkviliðsins og aðstæður á starfssvæðinu.